Andruno monologo

Kanak arakhadyilom, kothe ashilom varikaj pej granyica, maskhkar le chereste thaj le phuvate…

Bimuro avilas muro trupo andej luma, nichikanak nashtig reslom kaj e phuv. Sar jekh chiriklyi, kon opre o oceano hural, thaj ando paji tasolas, ba naj kaj tele te hural…

Trubundas te arakhav jekh cino niso, kaj shaj tele te hurav, pe soste kodol siklyon te huran, kon arakhadyon. Mange chi ashilas kasavo than.

Sar le oazishenge illuziji, unyivar dikhlom variso suntipe ando duripe, thaj kadal vizijura dosta durutne sas kodoleste, hoj te cirdenman angle, sagda majangle.

Le dorura zhutisarenasman sar te ashuvav thaj te nakhav andej vrama, pej luma… Ba sar opre pe le resina reslom, numa assanas tele mande le oceaneske khelale phunda…

Nas kothe phuv, nas kothe niso; numa le mangipesko shusho than, thaj o biagoresko paji… Nachilas muri zor… Perav…Na birinav majdur te hurav ando kasavo cheri, so mange phuv chi das…

Thaj sar perav tele, ando paji jekh cino viram pala sekundo po sekundo barol: le Kharoneski forma-j kodi! Ande leske vasta boldosaren le lopata, so sar o assav kotorarel mure sekunde -, thaj o bero aba tela mande tordyol, trubul andre te perav ando kodo…

Peske agoreste pashol o baldo, so man inke nashtig kezdindyilas.

Tela phabol o paji, opre shordyol o cheri, thaj khatikaj jekh cini phuv naj man… O chachipe le khanchesko bero-j, – thaj numa illuziji-j ,,opre-tele”, ,,kathe-kothe”. Apol nashtig kodo, hoj anda kaver dom po drom man mure chiriklyi-duxosa, sar anda kodo: phuveste te resav, akarsar!

Ba na birinos -, apol mure zumavipesa aba majbut potyinos, sar muro trajo…

Komentariši

Vaša email adresa neće biti objavljivana. Neophodna polja su označena sa *